وراء كل شخصٍ عظيم أرادتهُ

    هذهِ آخـــــر مدونة إليّ برحلة تحدي 29 يوم مــــع مرتضى ( والآخرة هي فاخــــرة ) على كولة أهاليتنا القديميين .

آني ياســـمين رســــــامة ( محترفـــة بالمستقبل القريب ) حــــابة أحجيلكم عن تجربتي بهذا التحدي ألتزمت خلال هالفترة بالرسم إلى أن صارت عادة يومية إذا مالزمت القلم وشخبطت أحـــــس أكو شي  ناقص بيومي . أختاريت الرســـــم بهــذا التحـدي لأن من طفـــولتي أحــــ 💗ب الرســــم و كبرت وأكتشـــفت أنهُ شغفي بالحياة الفـــــن و الرســـــم و حتى بفترات حياتي إلي تركت بيها الرســـم جانت تجيني عبرة لمن أشوف أدوات الرســـم و لوحات و رسومات لرسامين ، وجان أكو فد إيمــان عندي أنهُ في يوم من الأيام راح تجيني الفرصة بالوقت المناسب وأصير رسامة محترفة ...

صـــــدقــاً هـــذا التحدي من يوم ألتزمت بي صـــــــار عندي شعور آني أكتملت ولكيت ضالتي و شغفي بهذهِ الحياة .

الفـــن يجري بدمي ، بأختياري لملابسي و تنسيقها وحبـــي للألوان كلها ( الشعشاعية ) وجرأتي بدمج الألـوان بهدومي كل ذوقي فني و ممـــــيز .

طبعاً برحلتي ويه الرسم المريت بيها : مرحلتي الأولى بالطفولة رسوماتي جانت كارتونية بعدها تطورت للمـــــــرحلة الثانية وبديت أرسم بورتريه ( رغم جانت النسب مو مضبوطة والتظليل ضعيف ) ، المرحلة الثالثة بعد ما دخلت دورة ب 2019 وتعلمت أهمية التظليل وأدربت على رسم الــ ( still life ) .

آما المرحلة الرابعة أو الخامسة وصلتها بفترة التحدي زاد عندي أحساس عيني للظل والضوء و تدرجاته لكل صورة أو لقطة أشوفها ، تابعت هواية فنانين ع اليوتيوب وصار حسابي ع الأستكرام عبارة عن فنانين و رسامين .

                                                              رسمي بالطفولة

                                                           أول بورتريه رسمته بالتحدي

                                                      أول ستل لايف بالتحدي

                                                                    آخــــــر رسمات إلي

الأيـــــــام الجاية إن شاء الله راح توصلني لمراحل محترفة و متقدمة بالرسم . ( طبعاً قررت أقدم لكلية الفنون الجميلة / قســـم التشكيلي هذه السنة وأصقل موهبتي بالرسم أكاديمياً ) . آنـــــي على يقين بأستمراري بتحقيق هدفي وأوصل لهدفي لأن آني إنسانة صاحبة عزيمة وأصرار و دائماً أحقق أهدافي .

سعيــــــــــــــــــــدة لأن جنت بهذه التجربة .. وأتمنى لنفسي ولكل المشتركين التوفيق والنجاح ونحقق كل أهدافنـــــــا .

و مبــــــــــــــــروك للي راح يفوزون بالتحدي .

هـــــذه جانت قصتي ويه الــرســــم لحد الآن وللقصة بقية ونهاية سعيدة وعاشوووا عيشة سعيدة 

إلـــــــــــــــى لقاءٍ قريــــب ... وتحياتي .